Dal so Piovan xe andada un dì una Puta

Dal so Piovan xe andada un dì una Puta
Vicina a farse sposa
Aciò el ghe diga la Messa de Maria.
El Piovan gh'à risposto: A pian, sta cosa;
Qua bisogna parlarme schìetamente
Come se fussi al Confessor presente,
Se vu se' Puta
La Madona ve agiuta,
Ma se Puta no se'
Drento l'ano crepè;
Perché po no suceda sta Tragedia
De la gran Madalena
Co la Messa in ancuo se ghe remedia;
Parlè senza raziri...
La Puta qua ga trato dei sospiri;
E po l'à dito: Sior Piovan la diga...,
La diga pur la Messa...
La Messa ... de Maria. Oh Dio, che pena!
Ma con un poco de la Madelena.