Cossa v'à fato, o done veneziane

Cossa v'à fato, o done veneziane,
Quel vostro bianco povero faziol,
Che in testa nicolote, e castelane,
Ve metevi in leon co gera el sol?

E perchè invece ancuo porta le lane
Le muger e le fie del barcariol,
Come le dame, come le sultane,
Che va in pompa cussì perchè le pol?

Spiegheme sta rason de cambiamento,
O de Venezia mia bele donete,
Che muar ve fa stato e portamento.

Credeu che i possa dirve muneghete
Col bavareto in testa, o che spavento
Le done possa far modeste e nete?