Contro tre Correttori Patrizj

Do gran fati se leze in la Scritura
Che quando nu credèmo, i fa tremar!
D'un Faraon somerso in mezo al mar,
D'un Antioco che ai vermi è stà pastura.

Prova, che Dio con peso e con misura
L'omo castiga a norma del mal far,
Nè su questo se pol filosofar;
Principio el xe de lege e de natura.

Uno, el popolo eleto l'à scarnà
A forza de fadighe e d'estorsion;
E l'altro el Santo Tempio l'à spogià.

Co l'è cussì, feghe l'aplicazion
E dopo dedusè qual el sarà
El fin che farà el B...... el D...... el T.......