Confession

Nina, vogio contartela,
Nina, so inamorà.
No magno più, son palido,
Magro da far pietà.

So inamorà de un anzolo,
De un cherubin, de un fior.
E me consumo in lagreme,
E me torturo el cuor.

Me par tuto ridicolo,
Tuto me fa penar.
El mondo un gran zogatolo,
E bruto el sol me par.

Me dà fastidio i soliti
Amiçi, el bon umor
De çerta zente stupida,
Che vive senza amor.

E ziro malinconico
Su e zo per la çità,
Che un dì m'à parso splendida,
Che l'estro m'à ispirà.

Ziro, ma çerco inutili
Conforti, se quel fior,
Quel cherubin, quel'anzolo,
Xe sordo al mio dolor.

Nina, guarirme subito
No pol altro che un sì.
Verzi i bei lavri e dimelo...
L'anzolo ti xe ti.