Come va incontra un piccolo putello

Come va incontra un piccolo putello
Allo so mamma, che sia stà lontan,
con quel gusto che salta attorno un can
al so paron, co l’ha trovà l’osello,

come va allegro, e baldo el villanello,
a farse cogionar dal zarattan,
con quel gusto che una putta tien per man
el so novizzo, co’l ghe dà l’anello,

cussì nel ritornar, anema mia,
a vegnerte a basar la bella bocca,
me par che el mio piaser egual ‘l sia,

anzi tanto più grande, e più ‘l me tocca,
con quella differenza, che saria
dall’andar al passeggio a andar in cocca