Come che ho sempre dito pan al pan

Come che ho sempre dito pan al pan,
Cussì ve digo, che fra ste sals'onde
Viste ho do tette, a veder le seconde
Passar bisogna monti, mari, e pian;

L'una dall'altra le se stà lontan,
Nè le fa mareselo, o baraonde,
Per la bianchezza l'occhio se confonde,
Perché più bianche d'un dente de can.

Che de compagne se ne possa dar,
Mi no m'oppono, ma de più perfette,
Oh, no per Dio, no se ne puol trovar:

E se s'avesse ancuò de giudicar
El pomo d'oro a chi ha più belle tette,
Chi a queste el poderave contrastar?