Co vardo quel muso

Co vardo quel muso,
Quel muso da basi,
Me ardo, me bruso,
Voria... boca tasi;
Bisogna che diga
L'è proprio una striga,
La m'à inzinganà.

Co Cate me parla,
Voria, ve lo zuro,
Vorave basarla,
E se tegno duro
Lo fasso a dispeto
Del cuor che go in peto
Da amor strucolà.

Co mi ghe so arente,
Contento, beato,
Amor insolente
Me cresce sul fato,
Voria carezzarla,
Voria cocolarla,
Per dopo... chi sà;

Ma una so ochiada,
Che al mio vero afeto
La ze una stocada,
Me storna el progeto,
E senza far moto
So in stato ridoto,
Che movo a pietà.

Se po d'acidente
La Cate me toca,
No ve digo gnente,
Me vien l'aqua in boca,
Go pronte le prove
Che tuto se move,
Che so inamorà,

E alora, ripeto,
Beato, contento,
Scaldà da l'afeto,
Tentà mi me sento
Mostrarghe sul fato
El mio vero stato,
Per dopo... chi sà.