Chi non sa cosa sia cazzarse in letto

Chi non sa cosa sia cazzarse in letto
Co’ na ragazza zovene e vistosa,
Che sia tondetta, grassa, e buttirosa;
No sa cosa che sia gusto perfetto.

Là se gode ogni ben, ogni diletto,
Che dalle spine xe curà la riosa,
Che se quella xe po la so morosa,
Altro che ’l paradiso de San Piero!

Quando che se scomenza andarghe arrente
Una dolcezza tal in sen ne piove,
Che de sto mondo no se sa più gnente

Per che se svola, e cose tante e niove
Ne rallegra e beatifica la mente,
Che no se scambierìa col ciel del Giove;

Se trova un gusto grando
de far un contrabbando,

De metterghe in scondon
Senza gran suggizion

El so povero cazzo
In mona a quel mustazzo

De quella so morosa,
Che no è gnente ritrosa,

Che ha quei biondi cavei
Che no ghe xe i più bei,

Co quel vago musin
Fatto de late e vin,

Co quel bocchin ben fatto
De rider sempre in atto,

Co quelle do tettine
Durette e mollesine,

Co quel corpetto bello
Che xe fatto a pennello:

In summa sta ragazza,
Co lassa che se fazza,

No ghe xe certo al mondo
Un piaser più giocondo.

Che se po se ghe mette
El muso in te le tette,

E per mazor trastulo
Un deo nel bus del culo,

Allora ve prometto
Se va, co se suol dir, tutt’in bruetto;

Ma cresce el godimento
Quando che se xe là per andar drento,

Co per metterse in lena
Se fa che la ve ’l mena,

e co no la puol più
Se volta ’l culo in su,

Per tutto la se basa,
El culo se ghe nasa,

Po se ghe salta addosso
Col cazzo duro e grosso;

E cussì sutto sutto
El se ghe para tutto,

Se lassa che la traga,
La ciga che la faga,

E se va drento e fuora
Sin tanto che la sbora.

Altro che riose e fiori,
Che balsami e liquori,

Altro che late e panna,
Che zuccaro, che manna!

No ghè espression che basta;
La materia è sì vasta,

Che no ga fin nè fondo,
Me perdo, me confondo,

No so dove mi sia,
So che starave in mona in vita mia.