Chi no sa, che mi vivo per manzar?

Chi no sa, che mi vivo per manzar?
E per industria, e per voler de Dio.
Chi è quel che vol cercar el fatto mio,
Si consumo e si atendo a trionfar?

Chi nol sa, che no vogio bastasar?
Ni andar a questo, e a quel, tutto el di, drio?
Ni servir tal murlon, tal chichibio,
che no xe boni gnanca da brusar?

Chi non sa, che si havesse di ducati
Ognun me caverave de bereta
Si ben fusse sta cuogo a Giesuati?

Chi nol sa, che sta terra benedeta
Fa careze a un poltron vende-mustarda
E un savio à briga ch'un furfante 'l varda?