Chi à tempo no aspeta tempo

Un povero Vilan
Vedendo che un ricon del so paese
Andava ogni qual trato
Per consegi in mezà d'un Avocato,
El dise fra de lu:
Che i sia gnanca i consegi che fa richi?
Vòi provar anca mi, vogio un consegio,
S'anca lu me costasse el bon e 'l megio.
El va donca a la presta
Con do grossi dindioni
Da un Avocato, ma de quei de testa,
Che visti quei bestioni,
Ghe dise al bon vechieto:
Cossa voleu da mi?
El Contadin responde: un consegieto,
Un consegio volè?
Sogiunge l'Avocato, e ben parlè.
Ma, continua el Vilan: vogio un consegio,
No so po dirve qualo,
Ma quel ch'a vu ve par...
Demelo, via, ch'è vostro sto regalo.
- Son qua, ve servo in bota,
Responde l'Avocato al bon marmota:
Chi à tempo, vita mia, no aspeta tempo.
E in sto mentre el ghe leva da le man
I do dindioni al povero Vilan,
Che tanto lo ringrazia, e volta via
Tuto pien de contento e d'alegria;
E zonto a casa, el varda el so formento
Che no gera ben fato in quel momento;
Ma nonostante lu lo fa tagiar,
E i so fioli se taca a biastemar.
No i biastema per altro el zorno drio,
Che casca un tempeston, ne varda Dio!
Anzi i conferma tuti tre d'acordo.
Che chi trascura el tempo xe un balordo.