Che no parla? mi no parlo

Canzonetta per musica


Che no parla? mi no parlo;
Co le done son discreto,
El mio forte xe el secreto,
Nina mia, no dubitar.

Ma l'amor, co l'e de quelo,
E co l'anema l'à ponto,
Assicurete che sconto,
Cara Nina, nol pol star.

Basta un moto per tradirne,
Una languida ochiadina,
Una meza tocadina
Che te daga de scampon.

Posso ben per qualche volta
Far el bravo, el disatento,
Ma po capita el momento
Che me squagio da minchion.

Per esempio, co te vedo
Qualchedun tropo vicin,
Mi me sento un bruseghin
Che me inquieta e me fa mal;

E xe alora che me missio
Cambio ciera, levo suso,
E te fazzo bruto muso
Per paura de un rival.

Che no parla? Mi no parlo,
Sarìa proprio un omo indegno,
Ma che tasa, no me impegno
O le man, o i ochi, o el cuor.

Tropo, cara, ti me piasi,
Tropo inquieto son per ti
Per esiger che ogni dì
Staga sconto el nostro amor.