Che Berta filava

Che Berta filava
El tempo è passa.
Nineta, t'amava,
Che ben ti lo sa.

Mia sola ti gerì
Sovrana del cuor,
E voti sinceri
Te ofriva de amor.

Ma mai ti à volesto
L'oferta gradir
D'un cuor fido e onesto,
Nè afeto sentir.

Ripulse e disprezzi
Gaveva da ti.
Adesso i to vezzi
Fa fiasco co mi.

Felice e contento
Adesso mi son;
Per ti più no sento
Nissuna passion.

Ti è cara, ti è bela,
Nol posso negar,
Ma più no ti è quela
Da tarme inzucar.

Confesso, che amiro
Quel vago visin,
Ma più no sospiro
De starte vicin.

Cupido m'aveva
Ferio col so stral,
Ma po che me greva
De lu saria mal;

Vedendote tropo
Tirana co mi,
Savesto l'a dopo
Ferir anca ti;

E mentre ferio
L'à aponto el to cuor,
Mai più no ò sentio
Nel sen quel brusor.

Adesso son duro,
Ressisto a ogni stral;
Go el peto ch'è un muro
D' un antemural.

I vezzi, mia Nina,
L'ochiae, l'espression,
Sparagna, carina;
Per ti più no son.