Se de Venere el putelo
From Wikisource
(Redirected from Canzonetta veneziana (Se de Venere el putelo))
| Canzonetta veneziana de Carlo Goldoni XVIII secolo |
| Informassion su la proveniensa del testo |
Se de Venere el putelo
In Citera ha avù la cuna,
De Venezia la laguna
L'ha nutrio e l'ha arlevà.
Son sta in Franza, e son sta in Spagna,
Son sta a Londra e in Alemagna,
Ma ste care cocolette,
Veneziane graziosette,
Ma ste care trottolette
No se trova altro che qua.
Gh'è per tutto dei vulcani
Che fornisse Amor d'archetti,
Ma in Venezia i bei occhietti
Xe più forti, e meggio i tra.
Son sta in Svezia e son sta in Prussia,
Son sta in Grecia e son sta in Russia,
Ma ste care cocolette,
Veneziane graziosette,
Ma ste care trottolette
Non se trova altro che qua.
