Canzonetta per la Nina Viganò
From Wikisource
| Canzonetta per la Nina Viganò nell'atto di accompagnarle a Bologna la canzoncina per musica sulla barchetta de Pietro Buratti |
| Informassion su la proveniensa del testo |
Sta mia Canzoneta,
Che in copia ve mando,
L'ò fata, Nineta.
L'ò fata per vu.
Va se' quela Nina
Che pol col so inzegno
D'un omo de legno
Svegiar la virtù.
Metèghe pur drento
Quei bei cocolezzi,
Quei cari strambezzi
Che Amor v'à insegnà.
Piatanze da cogo
Ghe vol, cara Nina,
Per chi ga in rovina
Ridoto el palà!
Da brava imparèla!
E presto in Laguna
Al chiaro de Luna
Vegnìla a cantar.
Dal dì che l'ò fata
Nè Cate, nè Beta
Xe stade in barcheta
I freschi a chiapar.
El nome de Nina
Ga fin la mia gondola;
Nessuna me dondola
Se vu no tornè.
E Toni, quel gonzo
Che sa la mia pena,
El remo no mena
Se Nina no gh'è.
