Canzone ai deputati perchè facciano la regata

Sento a dir, che no se fa
La regata in sto paese
In un tempo che ghe qua
Più d'un principe e marchese.

In un tempo che ghe un duca,
Che nol fa vita privata,
Che se diga, struca, struca
No i ga fato la regata.

Dopo, che i ga speso tanto
In festini e laute cene,
Quando che per tuto quanto
Se pol veder de ste scene:

E la cosa strepitosa,
Che no ghè, se no a Venezia,
Che per tuto xe famosa,
Ch'ogni principe l'aprezia,

Questa qua no s'ha da far
In cussi bel'ocasion!
E che s'abia da contar
Me despiase sta rason.

Che i parenti a chiare note
De sTi quatro deputai
No volendo far peote,
Che se diga, i xe spiantai;

O che pur bona amicizia
Fra de lori no ghe sia,
E se diga l'è avarizia
Per no dir spilorzeria

No voria per tuto l'oro
Fuora andasse ti sentori;
Perchè certo el so decoro
Perderave sti signori.

Mi consegio chi ha l'onor
Sto Gran Duca de servir,
Ch'i altri staga nel so eror,
Ma de lori no far dir,

Perchè 'l Mondo, se no falo,
Dirà, questo xe un pretesto
Per cavarse da sto balo,
E no far, che vada 'l resto.

Se fa veder, che se fa
Tuto quelo, che se pol,
Che se i altri no ghe sta
La so testa no ghe diol.

La regata xe una cossa
De natura so assae bela,
Sempre è megio far qualcossa,
Che butarla in calesela.

Tanto più quando se vede,
Che sto Duca ghe n'ha vogia:
Che lu stà quà su sta fede,
Che per questo nol se anogia.

Se de tori in te la piazza
I ga fato quela festa,
Per dar spasso a la plebazza
No i farà per lu po questa?

Questa quà, che 'l puol zirar,
Come ho dito, tuto l' mondo,
Mai nè mai el puol trovar
Un piaser el più giocondo.

Col mio cuor afetuoso
Digo ad ogni Deputato
A sto Duca generoso
Feghe veder el regato.