Bos dö loviklöd in Bosnän

From Wikisource
Jump to navigation Jump to search

Alik nolom zelado, das loviklöd sibinom vätopo, ab glun pöfüdikün plo plöb oma binom in pop, kel no erivom nog lueni gletik ziveta; ibo pop nepekulivöl fetanom dölis ledifik, abu mene pekulivöl kapäl no dalom atosi. Sikod in vol pekulivöl spad nonik binom plo loviklöd.


Nag i pop in Bosnän vemo igeblibom kuliviko po net, kel famom oki ko nem »kulivatat«, loviklöd eninvulokom dibiko in om. Edlanom in pop lölik nen reladistin, semöpo umo, semöpo fibikumo. No binos mögik, lenunön dinädis valik, in kels loviklöd pubom, nendas men plepadomok alos töbiko du tim lonedik. Sikod onömodob te anosi dö loviklöd efe no sitiko, ibo dinads no daloms osi.


Pop in Bosnän no vilom milagön smakuni u smajevali, kel labom nato jöni seledik, ibo sagon, das smakun, spetivo smajeval dub atos pafemagom e oludeilom. Sikod lentanon smakune spetivo smajevale at spuni boadik zi nökeb, al dugön seniti mena su spun, e das men, du milagom spuni boadik, fögetom löliko milagön jöni smakuna u smajevala.


If sembal vipom, das jigok seitof nögis gletik, so mutom jedön nögi balid jigoka ove domi.


Sugivi gletik in loviklöd labom gok. Ab du omgok binom läbik, jigok blinof neläbi:


a)  If sembale tikäls badik puboms in neit, e beginoms vexadön e flapön omi, at no kanom libön oki sunumo, büfo omgok no kanitom. Ibo sosuno at kanitom, tikäls pafemofoms. Kod at stigom popi, sükön bidis jönik omgokas e gebön moni mödik plo omgoks jönik.
b)  No binos gudik, if jigok beginof kanitön äsliko omgok, ibo malos, das sembal in dom et odeilom suno. Sikod steifon funön lesuno jigoki at.


Äsliko kanit omgokik jigoka binom mal vemo badik, so pop tuvom i mali badik, if nebü sembal in bed patuvom in neit skopaf ud nim selednik votik.


Pop aidunom rätön läbi e neläbi in mod suköl: If log nedetik dlemom, atos malos neläbi; dlem loga detik malom nuni gälik.


Klödon, das voms teldik blinofs neläbi, lepato üf kolkömon ofis gödelo, if golon de dom. In fal at muton foviko getävön, ibo voto del lölik obinom neläbik.


If sembal dlimom, das juton me gün, atos malos, das ogetom nuni se fag; ab if dlimon, das geton moni, atos malos, das ozanon ko flen u ko pösod votik, ko kel lifon balifiko.


Segun sened mena edeilöl, pop kanom rätön, kiöpi lan edeilöla egolom. Ibo, if fun sembal stadom gagik, lan ota egolom sefiko in höli, ab if edeilöl labom logodi jönik, äsif smilom-la, pop sagom, das lan ata egolom sefiko in süli.


Tonabalienis nemödik at tefü loviklöd no esupenob, das sütovob loviklödi in Bosnän, äsif at no sibinom vätopo, sod das lilädans in dils difik vola ovedoms pesevik ko loviklöd bosnänik e das releigoms omi ko ut in län okas, das pasütovom leig e dif bevü loviklöd Bosnäna e länas votimik, luüno smalikoso, if no mögos gletikoso.

Sarajewo.
Ph. Mr. Leopold Cisar.




Se Volapük: Gased al pakam Volapüka 1894, Nüm: 5, Pads: 7-8.