Bids kil jimanas

From Wikisource
Jump to navigation Jump to search
Lekonil sansibarik, peposkonöl fa F. Meister.
Pelovepolöl fa Josef Schindler in Neusatz, Nugän.


Man sembal elifom vöno, laböl jimateli e sonis tel. Täno ejenos segun vil Goda, das om e jimatel oma edeiloms e sons bofik ebliboms soalik. Suno feit ebeginom bevü oms tefü dilam gelüta. Balim esagom: Ob binob bäledikum, sikod osumob dilis tel; ol kotenolöd ko kilid. Yunikum no cedom atosi as cödik e lesagom, das laf lölik gelüta lönom ome. Feit edulom lonedo dämü gelüt. Fino man sembal ekömom sagöl: »Kikod feitols so nepöfüdiko? Gololsöd al zif et semik, us lödom man et semik, kela sape nos binos pesävöl; nünolsöd ome kudadini olsik e dälolsöd omi cödätön.«


Nu blods egoloms al zif et. Ekömoms bifü dom mana sapik; at desetlidom al oms, e eko balib oma ebinom vietik äs milig, e hel blägik no ebinom in ot. Esäkom omis tefü desidan omas e ekonoms om e jeni lölik okas, viovemo ifeitoms kebalvoto, e vio no ikanoms balamön dö gelüt. Nu man esagom: »Atos binos din fikulik; no kanob cödätön dö atos, gololsöd al blod bäledikum oba.«


Elegivom omes slafi yunik as dukel, e etävoms dels mödik, jüs ekömoms al zif, kö blod bäledikum elödom. Ven enakömoms lä om, etakedom letiemo de hit dela. Slaf abu eningolom al om e enunom ome kudadini bofikas; nu edesekömom al oms. Enunoms ome jeni oksik e ebegoms konsäli oma. Ab om esagom: »Atos binos tu fikulik plo kapälüb obik, gololsöd al blod bäledikün oba.« Elogoms abu stunölo, das balib omik, plas binön vietik äs ut bloda yunikum oma, elabom helis dilo blägik, dilo vietik.


Ekegivom omes slafi as dukel e efovoms tävi okas, jüs ekömoms al zif, kö blod bäledikün elödom. Ven enakömoms bifü dom omik, ebinos zendel, e om e jimatel oma etakedoms in cem linedik. Slaf eningolom, das foginans tel ekömoms se fag veitik, pesedöl fa blods omik, al begön konsäli oma. Jimatel, seistöl galölo, elilof valikosi, matel ofik abu eslipom, no elilöl, kelosi slaf isagom. Esustanof kauto, e logöl, das matel ofik eseistom su dil sembal klotáda ofik, esumof jini e edekötof dili at klota, al no tupön slipi oma. Täno edisigolof e ebüdof slafes, mitelön jigoladi e kükön leüdi, al kanön mökön lefidi lotes. Du tim at lölik matel ofa eslipom levemo. Ven edagalom timü pozendelaplek, elogom dili pedekötöl klota e esäkom, kis atos malos-la. Nu jimatel oma esagof: »Ven eslipol, lots ekömoms in dom obsik, pesedöl fa blods olik, e sikod emutob sustanön al kudön, das peklietoms, ab eseistol su klot obik, sikod edekötob bufumo diledi at, ka das etupob-la slipi olik.«


Ven man edisigolom nu al pozendelaplekön, etuvom valikosi peleodöl e lefidi pemököl plo lots. Valiks esiadomsok e efidoms, e na foginäbs ifidoms, ekonoms ome kudadini lölik okas des begin jü fin, vio ifeitoms kebalvoto e vio no ikanoms balamön tefü gelüt. Om esagom: »Mutols dilön leimafiko, ibo ols bofik binols mans. If balim de ols binom-la vom, dil te kilid lelonomöv ofe, ab mane kildils tel; so abu binols mans, e bäledikum äs yunikum labom flagami leigik.«


Täno ebüdom slafe, tevön ko figinäbs e dilön bevü oms gelüti. Ab blods estunoms vemo, ven eloegoms, das balib oma ebinom löliko bllägik e nena hel vietik bal ebinom logik in om. Büfo also ededitoms, esäkoms omi, liko ejenos ga, das om as bäledikün labom helis te blägik in balib oka, ab balib yuniküna binom löliko vietik, e balib zenodika dilo blägik, dilo vietik.


Egepükom: »Atos binos deslopik, jimani kimik man labom. Jiman balimik binof jafäd lisälik. Jiman votimik binof äs gnuaf[1]. Nog jivotim binof sägo äs kanosaf[2]. Jimatel obik ye binof jafäd lisälik. Ven ikömols blefobüo in dom obik, esustanof, al vekömön olis e edekötof bufumo diledi klota ofik, ka das etupof slipi obik. Täno edisigolof al leodön domikibi, büfo edagalob-la. E somo no sevob kudis e glifis e hel no nog bal baliba obik peviötom. Blod obik telid labom i jimatani, ab jiat binof äs gnuaf. Dunof nosi, kelosi no büdom ofe dunön. Büdom ofe suipön, büdom ofe kükön, büdom ofe bedön; if büdom ofe nosi, täno seitof nosidunölo namis in vüm. Sikod balib oma binom lafo blägik, lafo vietik, äs elogols. Jiman bloda yunikün oba ye binof äs kanosaf. Luznaof du del lölik elenluvokof omi lä pöt alik me luvöds. Lemom ofe klotis, givom ofe moni, ab of luvokof te: »Man kimik binol. Ol binol obe vemik!« Vödis somik lilom de gödel jü vendel, e klu balib omik binom so vietik äs milig, e deno binom yunikün bevü obs kil.«


NOETS.

  1. Gnu.
  2. Schakal.




Se Volapük: Gased al pakam Volapüka {{{yel}}}, Nüm: 6, Pads: 6-8.