Barba Simon e la Morte

Scartabelando i so registri un zorno
La morte à trova un rosto. A conti fati,
Secondo el so caprizio, un certo vechio,
Chiamà barba Simon,
Doveva da vint'ani
Far tera da bocali; e co bravura
Se scrocava la vita: «a mi (la dise)
Te vegno a consolar le mie raise!»
E la tol suso la so brava falce,
La ghe dà 'l filo in pressa, e la sgambeta
Per cucarsclo in casa a cavalier;
La branca co dispeto el bataor,
E la dà una batua da creditor.

Barba Simon gera anda giusto in caneva
A spinarse una bote. A quel fracasso
El lassa tuto, el core, el sbalza su,
El spalanca la porta: «vita mia,
Un'altra volta (el dise) batè a pian,
Che za go bona rechia.
Oh, via, chi seu? cossa ve casca, vechia?

— Varda sto siega vite:
Goi bisogno de dir che son la morte?
Vegno a cercar quela forca de vechio
Che alogia qua de su... Dov'è la scala?
Sbrighemose, alon, presto,
Che disisete medici me aspea
A l'arcova d'un re.

— Go qua el fagoto,
Comare, e mi son pronto.
— Eh, no la go co ti! vogio, te digo,
Monsù barba Simon, voi quel spazzeta,
Che da un secolo squasì a le mie spale
Fa carneval del lacrymarum vale.
— Ò inteso ben, capisso: qua se trata
De far un pisoloto co la coa
A brazza colo de l'eternità;
E mi ve l'ò za dito, e mi son qua;
Perchè, a scanso d'equivoci, sapiè,
Che quel barba Simon che v'à mo fato
Saltar la mosca su la schizza, quelo
Son proprio mi!
— Me tostu per un'astese?
Ti? quel color, quei denti, quei cavei,
Quela gamba, quel'ose, quela vita,
Te l'à imprestai la bela Malgarita?

— Ma la xe mo cussì;
Barba Simon son mi!
— Adasio: parla schieto.
Te la intendistu forsi, bel vechieto,
Co quel famoso magnetizador
Che resuscita i morti?...

— So benìssimo
De chi volè parlar.
Ò sentio celebrar i so prodigi
So la zuca ch'el xe;
Ma mi con lu n'ò mai parlà a la fe!
— Donca ti ga un specifico,
Un elisir, un balsemo,
Qualche diavolo forte,
Che te tien vivo a spese de la morte.

Orsù, vien qua: vegnimo a pati; vivi
Fin che ti pol (che za una volta, o l'altra
Te cucarò anca ti), ma in ricompensa
Ti m'à da palesar el to secreto:
Nè aver paura za, che mi... minchioni!
No son minga imbriaga
Saria l'istesso che serar botega,
E voler dar el cul su la bancheta.
Fura quela riceta.
— Oh! l'è facile e curta in verità! —
— Ben, dila su —
— Son qua:

Bisogna che sapiè, comare cara,
Che fina da quei dì che la rason
M'à deslatà el giudizio,
Nè a vu, nè al zorno che volessi farme
L'onor de visitarme,
Co vostra bona grazia, n'ò volesto
Mai pensarghe un mumento.
Timor de l'avegnir? mi no lo sento,
Ò studià sempre da putelo in su
De tor el mal e 'l ben
Tal e qual com'el vien.
Goder, sofrir senza trasporti e smanie,
E per una secreta antipatia
Col pentimento, che xe 'l re dei guai,
Mi no so d'aver mai
Proprio abusà de gnente in vita mia.
Cussì, graziadio, son neto in utroque,
De viscere, voi dir, e de conscienza,
Vivo (che xe dei ani veramente!)
E vivo ben. N'ò domanda mai gnente,
Nè rifiutà mai gnente a la natura.
Oe, mi v'ò dito el medico e la cura.

Se sta riceta ga qualche virtù,
Vardeme un altra volta, e disè vu!»