Arivo de Cupido a Belun
From Wikisource
| ←A CUPIDO, PERCHÉ EL VEGNA A BELUN | Arivo de Cupido a Belun Anacreontica de Alvise Cicogna XIX secolo |
| Informassion su la proveniensa del testo |
Ecolo! ecolo!
Viva Cupido!
Scampà da Gnido,
Ecolo qua!
Su un salta nuvole
D'oro e d'arzento,
Portà da un vento,
L'è capità.
Psiche gh'è a latere,
La so dileta,
Co la lumeta,
Col cavalin.
El desiderio
Vestio de fogo
Ga el terzo logo
Nel carozzin
Ecolo, ecolo!
In Campedelo
El Furianelo
L'à messo zo.
Sorpreso el popolo
Nume lo chiama,
Re lo proclama
In prostinò.
Presto a l'omagio,
Zoveni eleti,
Divoti e lieti
Ofrighe el cuor.
Fremiti, e palpiti
No ve xe ignoti:
Savè che moti
Dolci ga amor!
Se el ferma stabile
Qua el so sogiorno
Sarà ogni zorno
Chiaro e seren;
El clima rigido
Muarà natura:
Fiori, e verdura
Darà el teren.
Ninfe belissime,
Ninfe vezzose,
No siè ritrose,
No abiè timor:
Canteghe un cantico,
Meteve in festa:
Che tra nu resta
El dio d'Amor.
