Anzoletta del ciel, senza peccà
From Wikisource
| Anzoletta del ciel, senza peccà (Sonetto XVI) de Maffio Venier XVI secolo |
| Informassion su la proveniensa del testo |
Anzoletta del ciel, senza peccà,
Sorellina d'amor mia picchenina,
Che cusì puramente fantolina
Ti ha el ciel dei to ziogheti innamorà,
Sia benedetto chi te ha costumà,
Pura colomba della casa orsina,
Sia benedetta quella gratijna,
E quel caro visetto inzucherà.
Benedetti i sestini e le zanzette,
Che a chi le sente le ghe cava el cuor,
O co se fa a un melon, le el sparte in fette.
O pare, o mare, o nena, o dio d'amor,
O stelle siéu per sempre benedette,
Che no ghe havé mancà d'ogni favor.
