Antitesi

Dise 'na vecia:^[1]
Che mondo bruto!
Che tempi oribili
Xe mai sti qua!
Par impossibile:
S'à cambià tuto
In te 'sti strepiti
Tuto à cambià!

Dise 'na zovene:
Tempi beati!
Mi tuta in gringola^[2]
Me sento andar
Se vive in estasi
Che se par mati;
Qua de continuo
Se pol amar

La vecia brontola:
Bógia de un fredo!
Me sento i brividi
Per i ossi andar,
Presto in malorsega^[3]
Andar me vedo,
Presto me imagino
Dover crepar!

Canta la picola:
El moro mio^[4]
Coi oci luçidi
El m'à vardà;
Lu xe el mio idolo,
Lu xe 'l mio Dio;
Geri, basandome,
El m'a strigà!

Note a cura de l'autor

1. ↑ vecia = vecchia.
2. ↑ in gringola = in allegria.
3. ↑ in malorsega = alla malora, al diavolo.
4. ↑ el moro mio = il mio amante.