Ancuò st'uso de Franza xe sortìo

Ancuò st’uso de franza xe sortìo,
Ch’al par dei cavalieri, e d’altra zente,
Và le donne a cavallo francamente
De trotto, e de galloppo, avanti, e in drìo.

Ma quel, che più me fa restar stupìo,
Xe, che s’anca la viaza longamente
Ma le prova un dolor, nè mai le sente,
Che la natura soa gabbia patìo.

Mo come xela? Ch’a ste donne mate
Fiachezza el cavalcar no sà causarghe,
Quando a tinti ghe diol ossi, e culate?

Altra rason per mi no so trovarghe,
Se nò questa; perché le xe assuefate
A portar spesso le so gambe larghe.