An Plattdüütsch fasthollen un Plattdüütsch starker maken

An Plattdüütsch fasthollen un Plattdüütsch starker maken weer en Andrag vun de CDU-Fraktschoon vun'n 9. Mai 2008 an de Bremer Börgerschop. Dor hett dat denn in de 25. Sitten an'n 2. Juli 2008 ´de Börgerschopsdebatte över den Andrag vun de CDU-Fraktschoon geven.

De Andrag is up Plattdüütsch stellt wurrn. En Hoochdüütsche Översetten weer achtern anföögt. De Text vun den Andrag weer düsse:

BREMSCH BORGERSCHAFT

Landdaag

17. Wahlperiood

Drucksaak 17 /394

09. 05. 08

Andraag vun de Fraktschoon vun de CDU

An Plattdüütsch fasthollen un Plattdüütsch starker machen Düütschland is bi de Europäische Charta för Regionaal- oder Minderheitenspraken mit bi. De Charta hett de Europaraat den 5. November 1992 in Gang sett, Düütschland maakt dor siet 1998 mit, un gellen deit dat Gesetz in Düütschland vun den 1. Januar 1999 op an. To de Charta höört na Artikel 15 Afsatz 1 ok, dat all dree Johr Berichten vordag kaamt. De drutte Bericht vun de Bundesrepublik Düütschland is 2007 ruutkamen; 2008 kummt dorto noch de Bericht vun den Sachverständigen-Utschuss doröver, woans dat mit de Charta in de Praxis utsüht, düsse Bericht geiht an dat Ministerkomitee vun den Europaraat. In düsse Berichten geiht dat ok utdrücklich dorum, woans dat mit Platt in dat Land Bremen utsüht: Woveel Platt warrt noch snackt, un wat warrt dorför daan, dat Platt nich noch mehr trüchgeiht? Dat gifft ummer weniger Platt-Snackers. Over de letzten dree Generatschonen sund de Tallen böös trüchgahn. Jüst hett dat Institut för de nedderdüütsche Spraak (INS) rutkregen: 1984 kunn in Norddüütschland noch jeder Drutte Platt snacken – nu sund dat bloots noch 14 Perzent. Liekers is Platt na dat Katalaansche de tweetgrottste Regionaalspraak in Europa. Wat dat mit Plattdüütsch wiedergeiht, hangt vor allen dorvun af, wat de Spraak vun de Olleren an de Jungeren wiedergeven warrt. Dat aver deiht de Lüde, de nu Kinner hebbt, nich mehr vun alleen. Platt steiht nu al op de UNESCOList för Spraken, de bald utstarven kunnen. Dat Platt eenfach so utklingt, dat mutt nich ween. Man de Spraak bruukt Hölp: vun de Borgers, vun de Wirtschaft, vun de Politik, vun ganz vele Sieden. Heel wichtig sund de Scholen, de de Opgaav as Anwalt för Platt overnehmen kunnen. De Borgerschaft (Landdag) schall fastleggen: De Borgerschaft (Landdag)

1. fraagt an: de Senaat schall de Borgerschaft (Landdag) in’n Harvst 2008 Bericht

geven över dat, wat in den Druttten Bericht vun de Bundesrepublik Düütschland na Artikel 15 Afsatz 1 vun de Europäische Charta vun de Regionaal- oder Minderheitenspraken binnensteiht, bavenan: woans dat um Platt in’t Land Bremen steiht;

2. fordert den Senaat op: he schall de Borgerschaft (Landdag) in’n Harvst 2008 en

List vörleggen, över de denn afstimmt warrn schall: wat warrt allens maakt, dat Platt in’t Land Bremen wiederleven kann un ok wedder mehr op de Been kummt. Over dusse Punkten schall de Bericht wat seggen:

• School un Bildung: Wo steiht Platt in de Lehrplaans binnen, wat för en Rull

speel Platt in den Unnerricht, wat gifft dat an Böker un anner Sammlungen för Platt in de School? Woans süht dat mit de Utbildung för Schoolmesters ut un mit de Wiederbildung?

• Kultur un Soziales: Wat för en Rull speelt Plattdüütsch bi de Kulturarbeit in

de Stadtdelen, wat maakt de Borgerhüser un wat gifft dat in de Sozialarbeit (to’n Bispeel bi de Pleeg vun ole Lüüd)?

• Medien: Wo goot is Plattdüütsch in Sendungen vun den öffentlich-rechtlichen

Rundfunk afsekert?

• Stadtdelen: Gifft dat in de Stadt plattdüütsche Schiller för de enkelten

Stadtdelen, oder is an dacht, so’n Schiller optostellen?

3. nimmt dat an, dat se tominnst eenmaal in’t Johr ehr Debatt op Platt afhollt.

Un se fraagt bi de Stadtborgerschaft un de Versammlung vun de Stadtverordneten in Bremerhaven an, wat se nich ok tominnst eenmaal in’t Johr tohope Platt snacken wüllt.

Frank Imhoff, Claas Rohmeyer, Dr. Iris Spieß, Thomas Röwekamp un de Fraktschoon vun de CDU