Amor e la Pazzia

Roto el scorzo del vovo
E comparso a la luse el mondo novo,
Tra le tombole e i salti,
S'à chiapà benvoler putei tant'alti,
Amor e la Pazzia,
Cussì, per una certa simpatia.
Lu, ancora co i so ochieti
Negri, negri, baronceli, furbeti,
Fin d'alora insolente,
Ustinà, malizioso, prepotente;
Ela, in gringola sempre e su la gamba,
Capriziosona, barufante e stramba.

I andava insieme a scuola,
Ma a cossa far? a far la gambariola
E dispeti per estro
A quel povaro Giobe de maestro,
E po i se la sbrignava
D'acordo a l'improviso, e i scorabiava
Per i campi del cielo,
Inverno, istà, senza scufia o capelo;
El zorno co le stele
Per l'etere zogando a le burele,
E corendo la note
Le poste sora el caro de Boote.

Ma el so divertimento predileto
Gera d'insolentar
I segni del Zodiaco; e per esempio
Quel frascon se meteva le zavate
De Saturno, e po andando come un sempio
Ora el strucava al Gambaro,
Ora al Scarpion, le zate;
E intanto la Pazzia
Pian pian per da drio via,
Robava qualche frezza al Sagitario,
E sbusava le tine de l'Aquario.
Lu cazzava per forza in boca ai Pesci
El folo: e supia... a ti, picolo, cresci...
Ela, in scondon, cambiava a le Balanze
Le scuele co do scorzi de naranze.
Lu cantava da galo in t'un canton
Per rider de la fufa del Lion.
Per distinguerli megio ela ai Zemeli
Coi dei tenti da ingiostro
Fava spesso i mustachi e le moschete.

Lu tormentava Capricorno e Ariete
Per caponarli come polastreli.
Ela fava a la Vergine un mazzoto
De ortighe fresche e ghel cazzava in peto?
E lu ligava un scarcavalo al Toro
Soto la coa per bombardarghe el foro
E cento altre de queste...
Curte... i gera do peste.

Qualche volta mo chiassando
For de regola in barala,
I taroca, i se petufa;
Li va Momo a separar.

Da là un poco po scordando
L'uno e l'altro el so dispeto,
I spartisce un bel pometo,
E i fa el terzo desparar.
Ma diseva benissimo... Chi gerelo?...
Un filosofo za... (accidit in puncto
Quod non contingit in anno). Una volta,
Zogando a la racheta
Giusto su la via latea, se no falo,
Xe nato tra de lori un disparer,
Che s'à fato contrasto, e po barufa.
Toca a ti, toca a mi... i se n'à dito
A pie cavalo. Amor
Voleva in bota convocar i numi
Per farse giudicar, ma la Pazzia
Furibonda, e nemiga in conseguenza
Dei brodi longhi logici d'Astrea,
Co la racheta in man ga lassà andar
Un mustazzon cussì bestial sul muso
A sior Cupido, che ga fato un'ora
Piover sangue dal naso,
E quel ch'è pezo, (Dio ne guarda tuti)
Ga macà i ochi in modo,
Che stuà el cesendelo
De l'otica virtù,
Quel povaro putelo
No ga po visto più.

Femena, mare e dea,
Ve lasso imaginar che bagatela
De fracasso che fa Venere in cielo.
E a dirvela po mi la compatisse.
Figurarse! fio solo! desparada
La core per la strada,
No la fa che un lamento,
De lagreme la sguazza el firmamento,
La se strazza la peta,
La ciga, e l'urla, e che la vol vendeta.

A un saltanuvole
La taca in furia
Do cigni scapoli,
La sbalza sù.
Branca le redene,
Schioca la scuria,
La sbrega l'etere:
No la gh'è più.

Ma mi la vedo... dove?
Ecola là... butada ai pie de Giove;
Dal dolor, da la rabia frenetica
Fra i sospiri, i singiozzi, le lagreme,
La compone un'istanza patetica
Che de Giove fa tenero el cuor.
Lu a conforto de tanta mestizia,
La soleva, la basa, la cocola,
Ghe promete compenso, giustizia,
Nume, giudice, re, genitor.

Dileta prole, calmati,
Anzi va là, Mercurio,
Va a dar el segno solito
Per la consulta negra,
Sì, figlia mia, t'allegra,
Vedrai la rea tremar.
Cara, s'io t'amo il sai!
Vogio andar mi in Pregai,
Avvenga che ne avvenga,
Vogio morir in renga,
Ma farla castigar.

Ma Venere, smaniosa
De interessar per ela
El libro d'oro de l'Olimpo intiero,
E memore che Giove
Per caratero peca d'apatia,
Lo ringrazia, se inchina e sbrissa via.

La core in precipizio da l'amigo...
Za me capì... da Marte;
La ghe la conta, la se racomanda.
Lu ghe presenta l'arme e la consola.
Dopo de lu la svola,
Più svelta d'una frezza,
Da Baco, che spinava un bariloto
De flogosi netareo. El la carezza,
E 'l ghe impenisce quatro volte el goto;
La cala da Netuno,
Solito a far per ela monea falsa,
E lu interinalmente la ristora
Con un bagno in utroque d'acqua salsa.
La va dal dio dei orti, e per distrarla
El ghe fa quatro freghe,
E po ghe torna a destirar le pieghe
Del caracò. La passa da Vulcano,
(Ma dopo Febo e Pluto)
Tuti la basa e ghe promete agiuto.
Ne la se scorda za de l'influenza
Secreta, ma potente,
Ch'el bel sesso plebeo
Gaveva sora i numi, che in quei tempi
Copiava, per clemenza,
I nostri miserabili costumi,
El netare lassava per la bira,
Come làssemo un
Per la polenta el fricandò, el ragù.
Prima de presentarse a le togate,
La va da le tabare;
E la prega la fiozza e la comare,
Ma rabiose de vederse
Dame e pedine in so confronto brute,
Una per una, tute,
Mentre le finge de compassionarla,
Freme de no poder proprio sfrisarla.
Cerca de qua e de là
La dea de la vendeta; ghe riesce
Cucarla al fin al club de la Discordia.

La se ghe buta in zenochion, la pianze,
La fa ai so guai le franze,
La depenze co tuta l'energia
La sevizie infernal de la Pazzia,
L'assassinio de Amor,
E la tenta ispirarghe el so furor.
Nemesi se la sbriga
Co quatro parolete da colegio;
Che Superbia e Ignoranza,
So sorele da late, e le tre furie,
Giusto arivae da Franza,
Rapacità, Impostura e Prepotenza,
L'aspetava de suso in conferenza,
Dubiose ancora, incerte
Nel far la scielta de le quaedam alia,
Da zontar a le strage za soferte
Per distrugerte alfin, misera Italia!
Dopo quatr'ore de consulta negra
Su le proposizion da presentar
A l'assemblea celeste general
Per punir la Pazzia; una saeta,
Come là in ciclo s'usa,
Ga convocà Pregai, Venere esclusa.

Ma za vestia da voto, sgrendenada,
Senza sbeleto, lagrimando perle
Sul palpitante tepido alabastro,
Che no so se 'l dolor o la malizia
Ga fato lassar là mezzo scoverto,
Tegnindose el putelo per le man.
Che co la binda ai ochi
Ridendo fin de la so trista sorte
Ruminava fra lu nove insolenze,
Venere su le porte
Stava za pronta a far le riverenze.

Passandoghe davanti
I senatori zoveni d'Olimpo,
Ghe mormora a la rechia
Morbide, in semiton, crome galanti.
Quei de la corte vechia
Tenta farghe d'ochieto,
E l'ochiada ghe mor su l'ochialeto;
Ma squadrandola ben da capo a pie
Giunon, Minerva, Cerere, Lucina,
Co le pupile inviperie,
Barbotandoghe drio, de la sgualdrina,
E a so fio, del bardassa,
O tosse, o spua, o fa un sbarlefo, e passa.

I sera... La se senta.
E per no trascurar gnanca chi resta
Venere va giustandose la vesta,
El cendà, el fazzoleto,
E intanto el nostro orbeto
Fa finta de sbrissar,
Per pizzegar le pupole bel belo
A Giano precursor de Zambonelo.

I à disputà tuta la note. Baco,
Savio de setimana,
Propone per condana
Che gabia la Pazzia descalza e nua
Da folar tuta de l'Esperia l'ua.
Netun se nota scontro, e vol mandarla
A dretura in galia
A bater l'acque de l'idrografia.
Pluto, per infamarla,
Vol in fronte belarla
Co un sigilo de fogo.
Priapo vol pestarghe el tafanario,
E farghe un sfriso sopranumerario,
Vala a cata... in che logo !

Se opone a tuti Marte,
Come tropo indulgenti,
E ghe mete in ridicolo ste parte.
Se la Pazzia gera mortal, lu in bota
La fava fusilar, e alora sì
Gera finia la razza dei bufoni,
Nè più se gavaria tanti omenoni.
Ma per tratarla pur militarmente
Lu la vol condanada eternamente
A far la sentinela
A l'ospeal dei mati de la luna.
Balotae — no ghe n'è passà nìssuna.

Cossa mo fava Giove?
Giove, che sempre ga la testa rota
O da le gelosìe de so moger,
O da le cavalae de Ganimede
Che lo ga in quel servizio e lo sbufona,
Sta su la so poltrona
A far casteli in aria,
Supia, sbadagia, mastega, savaria.
Ghe nasce quelo che ghe nasce spesso,
Fin la memoria el perde
De quel che ghe sta a cuor, che l'à promesso,
Tosse, brontola, dorme, e va in tel verde.

Torna i savj in colegio, e un'ora dopo
I capita in senato
Co una proposizion d'acordo estesa,
Che a pieni voti xe po stada presa.
Finalmente su l'alba
Sona la campanela. Tra la fola
Dei curiosi a le porte
Che aspeta la sentenza de la corte,
S'à visto incognito qualche pianeta,
Do aurore boreali e una cometa.

Eco insoma el decreto, tal e qual
L'à Mercurio stridà in original.
«In nome del destino; e così sia:
Inseparabilmente la Pazzia
Resti a fianco d'Amor quando si muove,
E meni l'orbo» sottoscritto: Giove.

Se Venere sia stada, o no, contenta
De sta condana, chi lo sa vel diga,
La smania de saverlo no me tenta.
Se ghe dol, che la ciga.
Mi no voi sindacar quel che i fa in cielo,
Che za son vechio e baso la pazienza
Ma vu altri, che se de primo pelo,
Penseghe un poco, amici, a sta sentenza,
Proclamada mo giusto da Mercurio.
Ohimè! no la me par de bon augurio;
E ve diria: Dio ve la manda bona,
S'anca ve ìnamoressi de mia nona!