Amor (Anton Maria Lamberti)

De confessartelo,
Nineta, credime,
No go rossor,
Imperscrutabile
Ne l'uman genere
Trovo l'amar.

Dise i filosofi,
Che amar in genere
Xe l'atrazion:
Che sta forza insita
Co la predomina
Forma le union.

Da la molecula
Indivisibile
Ch'esiste qua
A le rotabili
Masse de l'etere,
Tuto la ga.

Per questa rodola
Tanti sateliti
Atorno al sol,
Questa semandose,
Questa tolendose,
Tuto se tol.

Ela ve genera
L'acido, l'alcali,
L'etere, el sal;
La sa componerve
Bitumi, solfare,
Acqua, metal.

Le fibre organiche
Dei vegetabili,
Che in tera gh'è,
Ela le assimila,
E fa che i germini
Come vedè.

Nè ghe xe un atomo
Che al mondo sta,
Che amor no domini,
Che amor non animi,
Che amor no ga;

Ma discostandose
Dal mondo semplice
Sta relazion
Complicatissima,
E in ragion centupla,
Nasce l'union.

Perchè nei esseri,
Che una sensibile
Vita contien,
Tanto el s'imascara
Che un vero Proteo
L'amor divien.

Per questo, replico,
Nina adorabile,
Senza rossor,
Che indefinibile
Ne l'uman genere
Trovo l'amor.

Perchè sto diavolo
Lo trovo un piavolo,
Lo trovo un cavolo;

Perchè l'è un bocolo,
Perchè l'è un brocolo,
Perche l'è un mocolo;

Perchè l'è un'anima,
Perchè l'inanima,
Perchè 'l disanima.

Lu xe vivifero,
Lu xe pestifero,
Lu xe mortifero;

L'è zucherigero,
El xe saligero,
El xe acidigero;

El xe filantropo,
El xe misantropo,
El xe genantropo,

El xe notambulo,
El xe sonambulo,
L'è tenebrambulo;

L'è un bel putelo,
L'è un ladroncelo,
L'è un Machiavelo;

L'è un zogo.
L'è un logo,
L'è un fogo;

L'è un covo,
L'è un vovo,
L'è un lovo;

L'è un globo,
L'e un gobo,
L'è un robo;

L'è un mato,
L'è un gato,
L'è un flato;

L'è molo, l'è saldo,
L'è fredo, l'è caldo,
L'è curto, l'è longo,
L'è un alboro, un fongo,
L'è tondo, l'è acuto;
Nineta, l'è tuto.