Amor, méttime pur dove te piase

Amor, méttime pur dove te piase,
In torcollo, in sopressa, in salamora,
Tienme in posta del sol, tienme alla buora,
Bùttame in su la neve o in su le brase.

Muòveme guerra, fame tregua o pase,
Inchiàvame in preson càvame fuora,
Fa che romagna assolto, o fa che muora,
Ùsame pur, se ti sa zonte o rase.

El tuo fuogo co mi refresca e aggiazza,
El to giazzo co mi sì scota e bruza,
Tal che la to fortuna m'è bonazza.

E, prima, toio a dir ch'el sol no lusa,
Che un pugnal e una spada no me amazza,
Che mai spenda in to gloria la mia musa.