Amar, amar, amar

Nina, d'amor ne parla el çiel rosà,
Le rare nuvolete,
El sol basso su l'aqua, imporporà,
Le picole barchete
Che su l'ondina placida, liziere,
Lontan le svola via
Tuto dise d'amor vose^[1] sinçere,
Bela Nineta mia

Se una vela se perde nel lontan
Paçifico orizonte;
Se co ela se perde un senso arcan
De contentezze sconte^[2],
De l'altre vele vien a nualtri in volta^[3]
Più alegre sora 'l mar
Tute 'ste cosse, mia Nineta, 'scolta,
No le te fa pensar?

Varda el cocal^[4] che sora l'aqua svola:
Come che 'l ride: senti!
No par che anca lu creda a la parola
Dolçe e cara dei venti?
"Amar, amar", ne la so vose el canta:
"Amar, amar, amar"
Ti, mia Nineta, a la parola santa
No ti ghe vol badar?

Le nuvole, el cocal, el sol, l'ondina,
Varda, crede a l'amor
Solo el ridar del çiel, dolçe mia Nina,
Te dise gnente el cuor?
Pensa da novo, cara, al sentimento
Che me entusiasma mi:
Che le vele lontane o pur el vento
No diga gnente a ti?

Note a cura de l'autor

1. ↑ vose = voci.
2. ↑ sconte = nascoste.
3. ↑ vien a nualtri in volta = vengono verso di noi, alla nostra volta.
4. ↑ cocal = gabbiano.