Ala contessa Giustina

Vive ancora ne la storia
La memoria
De le bele zentildone,
De le care vostre none,
Che ne'l secolo passà,
Col morbin e co' l'inzegno
Dava lustro a la çità.

Quanta vita, che delizie
De patrizie,
Che festini, che çenete,
Che tesori de donete,
Che zornae de bon umor!
Sta Venezia gera el regno
De la pase e de l'amor.

Qua i foresti, d'ogni parte,
Qua fra l'arte,
Che par nata e coltivada
Da per tuto, in ogni strada,
Se vegniva a consolar.
Le sirene qua ghe gera,
Le adorae ninfe de 'l mar.

De quei dì, Contessa bela,
Qualche stela
Sluse ancora in ste contrae,
Serie e triste diventae,
Spunta ancora qualche fior.
Vu, bel fior de primavera,
Pien de vita e de candor.