Ala contessa Andriana Zon-Marcello

Qua fra i libri e i codiçi minïai
De l'Archivio Marçelo,
Me torna in mente i secoli passai,
La gloria de Venezia, el so splendor.
Me torna in mente el caro tempo belo,
El tempo de la forza e de l'onor.

Tuto un popolo morto alza la testa
Da ste famose carte;
Tuta una zente valorosa e onesta
Canta le glorie de la mia çità,
Canta el comerçio, le conquiste, l'arte,
Che de Venezia el nome à imortalà.

Çità de forti e sapïenti un zorno
Venezia mia xe stada,
Fin che da Bonaparte el vecio corno
Manin de testa s'à lassà cavar.
E ancora ancuo la vive sconfortada,
Ancora ancuo la s'à da rilevar.

Dov'eli andai quei dì che la laguna
Seminada de legni,
Pareva dir: qua vive la fortuna
Dei Veneziani, qua palpita el cuor.
Sti bastimenti porta in tut'i regni,
In tuto el mondo el veneto splendor.

Megio passar la vita, oh megio assae!
Sognando antiche glorie,
Qua fra i libri e le carte minïae,
E a le nostre miserie no pensar.
Megio, contessa, viver de memorie,
Coi nostri morti viver e parlar.