From Wikisource
Ridoto! Tempio de Fortuna e Amor,
Dove l'Omo che vanta la razon
Va a tributar (opresso de ilusion)
Oro, salute, vita, quiete, onor.
Dal tempo e da l'uman continuo eror,
Da la social viziosa convulsion
Ti geri per crolar, Tempio epulon,
Ma 'l vizio xe che te sostenta ognor.
Ti è tornà piu superbo; Amor e Sorte
Ti à visto a l'are; su quel'are ognora
Quante vitime, oh Dio, spiranti e morte!
Ma 'l Patriotismo che respira ancora,
Ma la Virtù, del Vizio assae più forte,
Te manda alfin Domenega in malora.
-
- Venezia aplaude a st'ora:
- Oh assae più de Solon, Licurgo, e Romolo
- Do Alvise, un Piero, un Lodovico, un Momolo![1]
- ↑ Alvise Emo, Alvise Zen, Pietro Barbarigo, Lodovico Flangini, Gerolamo Zulian, a quel'epoca i era sinque coretori de le leggi de la Serenissima, ndr.
