Al pitor Anzolo Dall'Oca Bianca

Anzolo, quela testa
Me svegia nela mia
Come una cara festa
De sol e poesia;

Me svegia le memorie,
Che me dormiva in cuor,
Lontane e alegre storie,
Bei palpiti d'amor.

Quel colo, quei cavei,
Quei negri oci sgranai,
Quel sen perso tra i veli,
Quei lavri imporporai,

Quel viso onesto e belo
Pien de verzinità,
Anzolo mio, l'è quelo
Che un dì go idolatrà.

Da gran tempo la nostra
Cara union ga finio,
Mi coro un'altra giostra,
Ela ga za marìo.

Se adesso se incontremo,
Se saludemo e po
Per vie diverse andemo,
Contenti tuti do.

Ma i bei zorni che, sconti,
Soli se spassizava,
Ma le barufe e i pronti
Basi che le quietava,

E i palpit e i tormenti
E i bei sogni d'amor,
Sempre li go presenti,
Li go scolpidi in cuor.

Anzolo, quela testa
Me svegia nela mia
Come una cara festa
De sol e poesia.

Lezo in ela la storia
Che go vissudo un dì;
Anzolo, sta memoria
La porto via co' mi.