Al mondo chi è soldao se fa chiattin

Al mondo chi è soldao se fa chiattin
E abbandona sto mondo traditor,
Così lasso anche mi l'arme e l'amor,
E mi dedico tutto al dio del vin.

Pianzo gramo i miei dì, pianzo quel fin
Che me preposi de virtù e d'honor,
E se l'esser pentìo lava l'error,
Eccome netto co xe un armelin.

Mai mi abbandono el vin, massime el bon,
Mai pi vani pensier m'entra in la mente,
Mai pi m'infetta el cuor l'ambition.

Mondo, i to beni è d'ingannar la zente,
Fatti co è le vesìghe de savon,
Che par sì belle e se resolve in niente.