Al conte Alessandro Pepoli

Se 'l povero Fetonte fusse stà
Capace come vu nel parar via;
I sturioni de Po no gaverìa
L'ingorda fame a spale soe sazià.

Mi mo, che vanto sempre verità,
E che adular nissun mai poderìa,
Sentì per mia opinion quel che dirìà
Su la vostra famosa abilità.

Dirìa donca, che credo fermamente
Che quelo de Fetonte, no sicuro,
Ma sucedeva un altro inconveniente;

Che a forza de scuriar e tegnir duro,
Come ve vedo far presentemente,
Ne fevi star quatr'ore prima a scuro.