Al Senato

Se podesse tornar qua sora tera
Quei vostri sì gloriosi antecessori
Che col sangue e con i so' sudori
De la Fede i xe stai scudo e bariera;

Vedendo sfigurà da quel che 'l gera
L'Evangelio in sti dì dai sucessori,
I vederìa che soto bei colori
Diretamente a Dio se ghe fa guera;

E se da l'urna se podesse alzar
Co la superba fronte l'Eresia,
Ve sentiressi forse a rinfazzar:

Che s'ela con più colpi l'à feria,
Vu, per voler la madre risanar,
Col manto de pietà l'avè finia.