Aibonedels bakuna

From Wikisource
Jump to navigation Jump to search
Lovepolam fa A. MARIN.


Men zivik ainedom pokagloki al sevön düpi velatiko; feilels sevoms oti gudikumo ka gloks, e nims aigudikumo ka feilels.


Efe, uts, kels no laboms pokagloki, lenlogoms soli; abu ven lefogs dagoms oti, pakofudoms.


Vägödelo in düp öt su bakun lanedadoma sembal leüd pajedom, e pejins lenflitoms kobo al lufidön oti. If sedilel zogom, pejins nevelo luletoms valädön omi sis düp kösömik, lekulädikumo ka glojoniel.


Lenlogön bakuni et binos lejönik a tidagik.


Pejins aikomipoms al dalöpön spadis gudikum; ek ästeifomöv momöfon[1] kopanelis e sumön leüdi lölik ple ok. Ven binoms satik, moflitoms; e täno spärs anik, ävalädöls su bim nilik fini lufida pejinas, lefälokoms zibadesidik ali bakun e susnäpoms glenis ple oks, abu muifiko, dlediko, neviko; ed if böset smalikün palilom, moflitoms. Leüdaglen anik blibom nog is e us.


Täno logon glumudili slenik, lilis vidik tel, logilis blägik käfikis tel, e göbi lonedik sütlidön se gul bakuna. Binom mug, kömöl zilogamo, zigolöl plafo; lekösumom lemänotis votikanas.


Nimils valik et laboms okikis döfis ä tugis, äsliko mens. Binoms vemo desidik, itasükik, käfik, glötik, abu i kautik e lüsumöl fätis püdo.


Kapälon legudiko, das leüd su bakun no binom pasedilöl leimafiko; das paplivilegöls sibinoms zenodü aibundan, äd uts kels aimütoms kotenÖn ko palemänölos. Abu sen natik betidom omis, das dinäds oibinoms egelo also ünä bakun et odulom ed ünä pejins, spärs e mugs osibinoms in vol.



Se Nunal nulik 1891, Nüm: 9/10/11, Pad: 50.




NOETS. (Vükifonät)

  1. Bükapök; pla: momöfön.