Ai correttori della Repubblica

Se tornasse a sto mondo
E Licurgo e Solon,
E tuti i sete Savj de la Grecia
I resterìa a la fè tanti cocali
Volendo riformar ancuo Venezia!
L'è andada sta Cità;
Sta Republica alfin
Più de tute à durà.
Co l'abito xe vechio
Nol se rinova più,
D'una velada se fa camisiola,
De questa le braghesse,
(E in braghesse, perdìa, semo ridotti!)
E quando le xe rote
Se mete dei taconi,
Se dà bei dei pontini
Per no mostrar el cul e i balotini.
De più no se pol far,
Dio solo xe capace de crear.
Co i vìzj à sotomesso le virtù
No gh'è rimedio più.
La gola, el lusso, la lussuria e l'ozio
Trionfa in sta Venezia,
E a coregerla ben l'è una facezia.
Peraltro se volè, Legislatori
Zelanti per la Patria,
Se volè, mi ve dago
Un ricordo sicuro ma violento
Da farve sgargatar, cavar i ochi.
Ecolo in bota qua:
Chiapè, tegnì, sarè la Dona in casa,
La Dona, sì, la Dona,
La Dona à rebaltà
Le legi e le virtù de sta Cità.