Ai amiçi veneziani

Tosi, son sempre quelo che savè,
E fin che vivo restarò cussì.
Me piase sempre el sigaro, el cafè,
Le done, e i libri che no scrivo mi.

Co son solo me par d'esser un re.
No go sòno la note, e 'l zorno sì.
Notola umana stago sempre in piè
Çercando rime fin che spunta el dì.

Cambio spesso de umor da poco in qua,
Spesso me trovo a spassizar su e zo
Soto un balcon che no xe mai serà.

S'el cuor vol far el mato, no lo so.
Ma s'el me crede stolido fin là,
Ve zuro, tosi, che lo fasso in do.