Ah! povareta mi!

«M'à visto el barba^[1] Bortolo
Ferma a parlar co ti
Madona! quante ciacole^[2]
Desso el farà su mi!
“Fermarse in strada!” subito
Sbragiar^[3] me sentirò
“Mi te go vista in estasi
Filar el rococò!^[4]

La prima volta e l'ultima
Varda che sia sta qua
Tose onorade” eçetera
Desso el me cantarà!
M'à visto el barba Bortolo
Ferma a parlar co ti
Madona! quante ciacole
Desso 'l farà su mi!»

Note a cura de l'autor

1. ↑ el barba = lo zio.
2. ↑ ciàcole = chiacchiere.
3. ↑ sbragiar = gridare.
4. ↑ filar el rococò = fare all'amore.