A una bela

Se ti credessi, viscere,
Co quele to ochiadine,
Co tante paroline
De averme inzinganà:
Mi te lo zuro cocola,
Ti t'à proprio inganà.

So che ste istesse grazie
Ti le dispensi a cento;
Ma senza sentimento...
Cussì... pour badinè:
E questo el modo, nonola,
Da sogiogar no l'è.

Vogio anca confessartelo,
Me piase i to scherzaei;
Ma scherzi senza afeti
No pol tocarme el cuor:
Ne la to testa imprimite,
L'è amor, che chiama amor.

El brio l'è bon, conservilo;
Ma via la legerezza,
E de la to belezza
Schiavo sarò anca mi:
Bela vechieta, intendistu?
Bisogna far cussì.