A un venditore di Vasi Sacri

Quel Mane, Thecol, Fares, che segnà
Xe sul muro de l'empio Baldassar,
Co da Daniel mel fazzo interpretar
Sento che l'è la pena al so pecà,

Per aver tolto al Tempio e profanà
I Vasi, che soleva adoperar
I Sacerdoti nel sacrificar
Le Vitime in le so' solenità.

Se la so' danazion scrita colù
Sora quela muragia lu el s'à visto
Perchè drento in quei Vasi l'à bevù,

E tì, de Baldassar drudo più tristo,
In fronte ti la ga, che ti à vendù
Quei dove, Omo e Dio; stà Gesù Cristo.