A nome dei parrochiani per la elezione di don Giovanni Cao

Eleto se piovan don Zuanne Cao
Anagrama purissimo de coa:
E infati de nu tuti lu xe cao,
Che drio ghe andemo come agnele in coa.

Poco à mancà che un altro fusse cao
E Cao dasseno deventasse coa:
Tanto gera el concorso da ogni cao
De chi voleva meterghe la coa.

Ma no i à podesto vegnirghene a cao:
I à fato fiasco; i ga sbassà la coa.
E no ghe resta che tornar da cao.

Cussi à volesto chi xe Cao e Coa;
Quel Dio che umilia chi va tropo in cao,
Quel Dio che esalta chi se mete in coa.