A dona Cate che ga schivà l'ocasion

Scusa, te suplico,
Museto belo,
Creatura amabile,
Dono del cielo,

Se ancuo sta letera
Mi te dirigo,
E ingenuo, acertite
Ze quel che digo.

No posso esprimerte
Co renitente
Gera nel scriverte,
Ma finalmente

El cuor, che domina
La volontà,
M'à fato debole.
M'à sogiogà;

Dunque perdonime
Sto passo ardito,
Non imputarmelo
Come delito,

O se ti reputi
Questa che sia
Colpa, assicurite,
No la ze mia;

No, indispensabile
La ze l'efeto
De un amor tenero,
De un caldo afeto

Che ga l'origine,
Catina mia,
Da un grado massimo
De simpatia.

So ben che rigida
Nel giudicarme
Ti è capacissima
De condanarme,

Perchè tantissimi
Ti me n'à dà
Segni infalibili
De crudeltà;

Qel dì teribile,
Quel dì d'inferno,
No lo desmentego
Mai più in eterno,

E no scordandolo
El me procura
Angustie e spasemi
Senza misura.

Forsi credevistu,
Ch'essendo sola
Podesse ofenderte
Co la parola?

Che prevalendome
De l'ocasion
Vegnisse a pianzerte
La mia passion?

Opur temevistu,
Che da indiscreto
Lassasse libero
Sfogo a l'afeto?

No posso crederlo
Più che ghe penso,
Saria suponerte
Senza bon senso,

Se incontrastabili
Per el passà
Del mio caratere
Prove ti ga;

Dunque no dubito,
Che averme arente
Te sia d'incomodo
O indiferente,

E che co' d'esserme
Ti ga zurà
Atacatissima
Ti m'à inganà.

Gaveva in colera
Fato al mumento
El solenissimo
Proponimento

De più no vederte,
E de scampar
Da dove solita
Ti ze de star,

Ma amor vivissimo,
Amor più puro,
M'à fato subito
Esser spergiuro,

E in gnanca un atimo
I mii pensieri
Gera a dirigerme
Dove ti gerì.

Perchè concederme
Vol la natura
Un cuor sensibile
Oltremisura,

E a ti un amabile,
Un seducente,
Che pol descriverse
Dificilmente,

Ma un cuor, permetime,
No averte a mal,
Duro, durissimo
Più de l'azzal?

Cate, no esagero,
A la mia mente
Ze la to imagine
Sempre presente,

Me par de vederte
In ogni sito,
ln ogni angolo
El più romito,

E in mezzo a l'anima,
Minià dal fato,
Incancelabile
Go el to ritrato.

Se ti è insensibile,
Se ti è de sasso,
Se le mie lagreme
Fusse el to spasso,

Crudel! palesite
Senza dimora,
No far zogatolo
De chi t'adora;

Dilo si, dimelo
Liberamente,
Che in ogn'ipotesi
Sarò prudente,

Me farò obligo
De gran secreto,
Sia del to biasimo,
Sia del to afeto;

Solo rifleterte
Me sia permesso,
Che crudelissimo
Oltre l'ecesso,

Anzi che barbaro
Ghe vol un cuor
Per no concederghe
Premio a l'amor.

Cara, perdonime
Sto mio trasporto,
Soleva un misero
Senza conforto,

Pensa che merita
Ben compassion
La severissima
Mia situazion,

Che ze tiranide
Co se ricusa
Socorso a un povero
Cuor che se brusa,

Che 'l ciel dei miseri
Fa la vendeta,
Quando el colpevole
Manco l'aspeta,

Che alfin dei calcoli
Se go falà,
Amar un anzolo
Ze 'l mio pecà,

Che... ma qua termino;
Perchè me sento
Deboto vitima
Del sentimento;

Me oprime un palpito
Drento del peto,
No ga più regola
El mio inteleto,

La man me tremola,
Scrivo a gran stenti,
Scrivo co l'animo
Pien de tormenti;

Cate! perdonime,
Te lo ripeto
Sto iresistibile
Sfogo d'afeto,

E se ai mii spasemi
Sorda ti è ancora,
Almanco tolera
Che mi te adora.