A Zagno Barbiero

No posso far de manco,
Zà che m'avè stordìo
Con quel tetarme tuti el dì da drio,
De no chiapar intanto
La pena e 'l calamar per darve vanto.

Dirò a la bela prima
De le vostre fatezza
Per megio destrigarve le belezze;
E con la Musa lesta
Darò principio a bisegarve in testa.

Vu se', per quanto sento,
Filosofo, Organista,
Musico, Balarin, bravo Contista,
Poeta in prosa e in rima,
Bel furfanton e ziogador de scrima.

Gran cosa, che un par vostro
No possa mai dir vero!
E tegna dur frapando un ano intiero
Senza trovar la zufa
D'un che ve rompa el muso e ve scabufa!

Vu chiamè pur a ogn'ora
Con ste vostre frapade
Diese megiar lontan le bastonade;
Ch'altro no v'assegura,
Che la fortuna che dei pazzi ha cura.

In quanto a mi, no posso
Con vu più star a segno,
Chè in vostro paragon sembro de legno.
E perdo anca in presenza
El cervel, la dotrina e la pazienza.

Vu fè, da bel inzegno,
Bel om, bel piè, bel viso,
E ceder no volè gnanca a Narciso;
Anzi, che in pè del fonte
Sora d'un cantar ve spechiè la fronte.

No stè donca più a dirme
Che se' nassuo d'un Grande,
Vu che un brazzo mostrè da sbater giande
Tanto al bifolco inclina
La vostra stela iniqua e malandrina!

Barbier da tre quatrini,
Vilan pien de falope,
Andè a tosar pagiari, a rader fiope,
E se 'l rasor ve scapa
Esercitè la man fra vanga e zapa.