A Venezia

Quanto bela ti xe, Venezia mia!
Mi no posso finir mai d'amirarte
Paradiso sul mar, cuna^[1] de l'arte,
Viver sempre e morir qua mi voria

Co' ti xe tuta piena de alegria
Ti ti me scaldi 'l cuor solo a vardarte;
Co' 'l çiel xe bruto e par che 'l vogia odiarte,
Sento in tel cuor 'na gran malinconia

Venezia cara, silenziosa e quieta,
Xe la belezza tua che à sugerio
Versi al zovene cuor mio de poeta;

Venezia, logo che no ga 'l secondo,
Te vogio ben come a 'na mare el fio:
Lontan da ti mi son fora del mondo

Note a cura de l'autor

1. ↑ cuna = culla.