A Paulo Fambri

Fambri, le nostre carte
Val più d'ogni dotrina,
Val megio assae de l'arte
Una partìà a conçina.

Lassa che soto el dente
Dei sorzi, in librarìa,
L'autor più sapïente
Perda la so albagìa.

Lassa i povari morti
Star co i ragni in quïete,
Gnente no dà i conforti
De una partìa a tressete.

Cossa mai giova a l'omo
I nobili suori?
Studiar tomo per tomo
Un popolo de autori?

Strussiar la vita come
Bestia da tiro, farse
Co' gran fadighe un nome,
Magari immortalarse?

Sempre nemiçì sconti,
O a visiera alzada,
Lo aspeta al varco pronti
A sbararghe la strada.

Un mondo de tormenti
Xe de la gloria el fruto.
Cani che mostra i denti
Ghe sbragia drìo per tuto.

Megio scordar el vecio
Mondo pien de amarezze,
E a briscola o a cotecio
Çercar nove alegrezze.

Le nostre bele carte
Val più d'ogni dotrina,
Fambri, val più de l'arte
Una partìa a conçina.