A Mariana
From Wikisource
| A Mariana de Attilio Sarfatti XIX secolo |
| Informassion su la proveniensa del testo |
- 1
Ride più alegro el sol su la to drezza,
Sui to caveli d'oro iluminai.
L'arieta del tramonto te carezza,
Te zira atorno e no te ofende mai.
L'arieta calma e fresca de la sera,
Te basa el viso pien de primavera
El viseto zentil de madonina,
Saludà da l'aurora ogni matina.
- 2
O botonçin de rosa fresco e belo,
Pien de dolçi profumi e de colori,
Forse t'à visto in sogno Rafaelo,
Vestìa de bianco fra mile splendori.
Madona e rosa, che mai no scolora,
Chi te vede se infiama e se inamora.
E invidia el sol che indori la to drezza,
L'arieta che te basa e te carezza.
