A Lucieta

Lucieta
Careta,
Sè un muso da basi,
Ma strambi xe i casi
In fato d'amor.
Gh'è un'altra
Più scaltra,
Che briga,
Che striga,
Che intriga,
Che proprio me stuzzega
La ponta del cuor.

Lucieta
Careta,
Sè assae più ben fata,
Ma st'altra è più mata
Scaldada d'amor,
E l'omo
Xe un tomo,
Lo impizza,
Lo istizza
Le done, che stuzzega
La ponta del cuor.

Schincheti,
Corneti,
Li fa squasi tute,
Ma quei dele astute
Xe salsa d'amor.
Culia
Xe galia,
Sa farli,
Impastarli,
In modo che i stuzzega
La ponta del cuor.

Lucieta
Careta,
Za so un baronato,
So strambo, so mato
Co fazzo l'amor.
Vel digo
Da amigo:
Tochè,
Biseghè,
Ma st'altra me stuzzega
La ponta del cuor.