A Giacinto Gallina
From Wikisource
| A Giacinto Gallina dedicandoghe un libro de rime de Attilio Sarfatti XIX secolo |
| Informassion su la proveniensa del testo |
Galina mio, ste povare
Rime de amor, disperazion e festa,
Se racomanda a ti.
Col to bel nome in testa,
Sicure, ardite, libere,
Ala luse le vien cara del dì.
Forse de zente stupida
Ga da farghe paura i malumori,
Se de çità in çità,
Premio dei mii suori,
Col to nome, simpatico
Come un augurio, in ziro le andarà?
Poesie malinconiche
Come la note, o come la matina
Piene de sol e amor,
Ziré col mio Galina,
Col caro amigo, e ai povari
Deghe speranze, ale putele un fior.
