A Cupido, perchè el vegna a Belun

Dà fogo a la regia,
Che in Gnido ti ga,
Amor, o po scampa,
E piantite qua.

Adesso i corsari
Infesta quel mar:
Ti istesso i to popoli
Ti stenti a salvar.

Ecidio, discordia,
Ga sparso el velen:
Ti à perso la pase,
No ti ga più ben.

Vien qua, no fermarte,
Mi temo de ti;
Poi far i ribeli
Più tristi i to dì.

Qua in mezzo sta vale
Sicuro ti xe;
Sta zente xe pronta
A farte so re.

Un fiume i tributi
Ai pie portarà
Dei monti, che mure
Al regno sarà.

Le amene delizie
No ga qua confin:
Sta vale te 'l zuro
L'è un vero giardin.

Qua el campo, qua el bosco,
Qua el pogio, qua el pra,
Qua el fonte, el torente,
Qua tuto ti ga.

Ma chi de la vale
Po forma l'onor,
L'è un popolo colto,
Gentil, e de cuor.

E mile, e più ninfe,
Invidia del ciel,
Che in viso le rose,
Sui lavri ga el miel:

De ninfe, che a Palade
No cede, e a Giunon
E forsi anca a Venere...
Ma zito! perdon!...

So ben chi te sia
La dea del piacer:
No fazzo confronti,
Che possa doler.

Amor, gastu inteso?
Ascoltime mi;
Vien qua, e più contenti
Ti condurà i dì.