A Bianca

1

Li sa i pórteghi scuri e le calete
I zuramenti e i lampi dele ociae,
I gran discorsi in poche parolete,
Parolete de amor che dura assae.

Se zirava, zirava avanti e indrio,
Fermandose ogni tanto a dirse adio.

Ma che lassarse? se zirava ancora
Tirandola de quarto in quarto d'ora.

2

Te recórdistu, cara, el primo zorno
Che pauroso in piazza t'ò fermà?
Da mesi e mesi te zirava atorno,
Ma no t'aveva fin quel dì parlà.

E parlandote... oh Dio, che çerto efeto!
Tremava tuto come un scolareto.

Ti m'à risposto de volerme ben...
Madona! el cuor me se spacava in sen.

3

I bei oci de fogo, el bianco viso
Ti sbassavi ale mie dichiarazion.
Ma ogni tanto el to angelico soriso
Me se mostrava pien de compassion.

Ogni tanto... (memorie deliziose!)
Sconti in una caleta, a meza vose

T'ò dito: lassa che te daga un baso.
E ti... aqua in boca... no irabiarte... taso.